Líonra ríomhairí

Séard is líonra ríomhairí ann ná bailiúchán de ríomhairí atá ceangailte i mbealach a ligeann dóibh sonraí agus acmhainní a roinnt.

Cárta cuibheora líonra

Catagóirí Líonraí

Tá dhá phríomhchineál líonra ríomhairí ann:

• Líonra achair logánta (Local Area Network/LAN) – Achar beag, príobháideach agus sciobtha, ríomhairí pearsanta agus gléasanna eile ar nós printéirí á gceangal
• Líonra achair fhairsing (Wide Area Network/WAN) – Achar mór, líonraí logánta á gceangal le chéile

Na Comhpháirteanna

Bíonn na comhpháirteanna seo a leanas ar líonra ríomhairí ar bith:

• Na ríomhairí féin (nó na hóstaigh)
• An cainéal cumarsáide

Óstaigh

Úsáidtear an téarma óstach (nó amanna nód) go minic le haghaidh ríomhaire atá ceangailte le líonra. Bíonn crua-earraí cumarsáide ag teastáil leis an óstach a cheangal leis an líonra (m.sh. cárta líonra agus cábla líonra). Bíonn crua-earraí eile in úsáid leis an líonra ar fad a cheangal le chéile (m.sh., moil, lasca, ródairí, srl.). Bíonn bogearraí cumarsáide ag teastáil ar an óstach freisin. Is minic a bhíonn siad seo mar chuid den chóras oibriúcháin. Bíonn seoladh uathúil ag gach óstach ionas gur féidir iad a aithint óna chéile ar an líonra.

An cainéal cumarsáide

Bíonn an cainéal cumarsáide bunaithe ar mheán fisiceach éigin. Déantar na sonraí a aistriú ina ngiotáin ar an gcainéal seo. Tá trí phríomhchineál meáin ann:

• Meán leictreach (m.sh., cáblaí péire-casta, cáblaí comhaiseacha)
• Meán optúil (m.sh., cáblaí snáthoptaice)
• Meán gan sreang (m.sh. Wi-Fi, comharthaí satailíte, comharthaí micreathoinn)